PARIS, PARIS...

E para rematar o curso e a súa estancia no centro educativo, o alumnado de 4º de ESO marchou a Paris!!! Foi unha viaxe increíble, chea de monumentos, amigos, risas e pizzas. Foron tan só cinco días pero moi ben aproveitados. 1º día: viaxe Arcade- Oporto- Paris, onde houbo tempo para facer unha visita panorámica por la Praza da Concordia (aló si que rodaron cabezas!), Les Champs Élyssés , Place de l'Étoile, La Defènse... 2º día: visita a Louvre (Venus de Milo, Victoria de Samotracia, O Escriba Sentado, os touros alados mesopotámicos e a incomparable Giocconda. Se a mañá foi intensa, a tarde non se quedou atrás. Despois dun rápido bocadillo e un partido de confraternización cos parisinos, visitaron a tumba de Napaleón en Les Invalides, contemplaron desde o Bateaux Mouches as marabillas parisinas e subiron a gran señora: a Torre Eiffel. Non hai que dicir que chegaron reventados ao hotel. 3º día: Dineyland. Pasaron o día entre fantasía e...choiva. 4º día de madrugón, pero ben merecido. Primeiro a Catedral de Notre Dame de Paris, La Conciergerie (último refuxio de Mª Antonieta antes de ser guillotinada), Barrio Latino e depois, con Manuel o noso paciente conductor, a Versalles. Aínda houbo tempo de pasar por las galerías Lafayette e, os máis valentes, aínda se animaron a ver o Cemiterio de Montmartre, o café onde se filmou a pelicula Amélie e o incomparable solpor desde o Sacre Coeur. 5º día: a pesar de que estaban moi cansados, non rechistaron subindo a Montmartre e visitando o Sacre Coeur. Despois, xa non houbo tempo máis que para coller a maleta e dicir: AU REVOIR, PARIS! O mellor da viaxe: o comportamento dos alumnos/as! Noraboa e grazas.

ECOPARQUE (MARÍN)

A piques de rematar o curso, o alumnado de 4º de ESO disfrutou dun día de exercicio físico e divertimento no Ecoparque de Marín.

SOTAVENTO

Despois da ponte de maio, o alumnado de 4º de ESO viaxou ata o norte do país para coñecer de cerca unha planta eólica tan importante como a de Sotavento.

VISITA AO MUSEO ARQUEOLÓXICO DE PONTEVEDRA

Un curso máis, o alumnado de 1º de ESO poido visitar as magníficas obras depositadas no Museo Provincial de Pontevedra, xa en pleno traslado ás novas dependencias. Despois, visitaron as rúas da cidade vella e aínda tiveron tempo de saborear un xelado antes de regresar ao centro.

ARTE EFÍMERA NA PRAIA DA LANZADA

Os rapaces e rapazas de 1º de ESO demostraron as súas dotes artísticas e creativas reproducindo os cadros máis famosos da Historia da Arte no areal da praia da Lanzada. Xulgade vós mesmos o resultado.

CIENCIA vs FICCIÓN

O departamento de Tecnoloxía xunto co Equipo de Normalización Lingüística do centro organizou unha video conferencia para que os alumnos de 2ºde ESO perderan o medo ao mundo da ciencia. Non temos imaxes do evento, pero podemos asegurar o interese mostrado polos rapaces.

GUIMARAES

Os días 9 e 10 de abril foron os alumnos/as de 3º ESO a visitar Guimaraes co Proxectoterra. O primeiro día, o arqueólogo da Citania de Briteiros explicoulles os secretos da vida nos Castros e o esforzo que fan para mantelos fóra do alcance dos eucaliptos e da desidia humana. Despois de comer, acercámonos ata o Mosteiro de Souto San Salvador para entender a evolución dos núcleos de poboamento no período medieval. E, de camiño para o albergue, aínda tivemos tempo de ver algún dos edificios emblemáticos da cidade. A noite foi longa e moi divertida para algúns que, por certo, ao día seguinte rendíronse ante o irremediable cansancio. Almorzamos ás 9:30 e saímos coa guía a visitar algunhas das antigas fábricas de couros que se conservan en perfecto estado. Antes de acercarnos ao castelo e ao Pazo dos duques de Bragança, os rapaces e rapazas, divididos en grupos de 7, tiveron que darse presa para atopar as respostas do cuestionario que lles tiña preparado a nosa guía. Algúns foron raudos outros…non tanto. Comimos no albergue e a durmir a sesta no autobús! Con pena deixamos o país veciño que moi lonxe de sucumbir á sorte da implacable crise, seguen loitando para manter o país limpo e arranxado.

CADA SEMANA UN POEMA

Despois dunha tensa rivalidade, o 21 de marzo falláronse os premios do concurso: CADA SEMANA UN POEMA. Houbo moitos premios e premiados.

Pero, entre todos, hai que mencionar a Miriam Pérez Reguera (1º premio), Raquel Fernández Reguera e Miguel Soto Nogueira (3º premio) pola súa sensibilidade e pericia literaria.

NORABOA aos galardonados, aos que participaron e aos profes que organizaron o concurso, por certo, con rotundo éxito.

TEATRO EN INGLÉS

O martes 5 de marzo o alumnado de 2º, 3º e 4º de ESO asistiron a una obra de teatro en inglés no salón de actos do centro. Non só aprenderon, senón que o pasaron estupendamente rindo as bromas dos actores.

INAUGURACIÓN

O pasado venres 1 de marzo e para sorprender á primavera con cores renovados, inauguramos o invernadoiro do centro.

A iniciativa de levantar un invernadoiro partiu dos profesores/as de diversificación curricular na súa comprometida loita por abrir camiños máis motivadores e prácticos de cara a onde dirixir ao alumnado. E aí están, dispostos a facer medrar leitugas, cebolas, plantas aromáticas, fresas...

Desexámoslles moita sorte e esperamos con impaciencia a primeira cosecha!

NATUREZA

Como xa ven sendo habitual, no mes de febreiro o alumnado de 1º ESO colle os sachos e as botas e marchan ao monte a facer a súa pequena-gran contribución co medio natural: a plantación de árbores. A actividade está organizada polo departamento de CCNN e o ENDL.

O XORNAL NA ESCOLA

O pasado 20 de febreiro, o alumnado de 1º ESO visitou FARO DE VIGO e, a pesar de que a rotativa estaba pechada, poideron percorrer o resto das instalacións. A actividade foi organizada polos departamentos de Lingua Castelá e Lingua Galega.

!ENTROIDO!

O pasado 8 de febreiro non foi un día radiante, pero cando menos, permitiunos celebrar o divertido entroido cos nenos/as. Asistiron políticos, policías, "indignados", membros da igrexa, superheroes e, por haber, ata se nos colou unha pita enorme. Os premios quedaron nos terceiros: Pablo volveu a gañar o concurso de tartas por segundo ano consecutivo (aquí hai madeira de cociñeiro internacional) e o de comparsas foi para o grupo de 3ºB coa súa titora, Andrea, á cabeza do jolgorio. Pois aí vos deixo unhas fotos da nosa reportera gráfica, Iris (alumna de 4ºA).

                                                                  3ºB GAÑADORES

IGUALDADE

Entre os días 16 e 23 de novembro, todo o alumnado da ESO asistiu aos talleres sobre IGUALDADE que se celebraron no noso centro. Durante dúas horas, participaron en xogos de simulación, veron vídeos e escoitaron falar de igualdade de xénero, a ver se a semente xermola axiña! A actividade estivo organizada polo departamento de Orientación.

CONFERENCIA

As cousas non sempre saen ben á primeira, así que, despois dun primeiro intento fallido no que o alumnado se tivo que conformar visitando a exposición titulada "Balea Negra", os alumnos/as de 3º e 4º de ESO, por fin, poideron asistir á conferencia sobre "VANTAXES E PERIGOS DAS REDES SOCIAIS". O evento estivo organizado polo departamento de tecnoloxía e se celebrou no salón de actos do centro educativo. Laura Martínez, alumna de 3ºC refírese ao que máis lle sorprendeu:

"...Lo que más me llamó la atención fueron dos cosas: la primera fue la llamada identidad digital, es decir, cuando entregas un currículum a una empresa lo primero  que hacen es ver tu nombre y buscarlo en GOOGLE para recoger todos los datos que hay sobre ti, como por ejemplo, tus redes sociales, en las cuales miran tus fotos y de eso depende mucho que te acepten para el puesto solicitado o no. Lo segundo que también llamó bastante la atención es que las empresas funerarias se encargan de desactivar las cuentas en las redes sociales de los fallecidos, y me parece una gran idea, ya que cuando fallece un familiar o amigo no es nada agradable ver sus redes sociales abiertas".

                          O alumnado atendendo á explicación do monitor (Exposición "Balea Negra")

MAGOSTO

O tempo de outono, plomizo e chuvioso, deunos un respiriño para poder celebrar o magosto. Non faltou ninguén á cita co lume e as castañas, todos no seu posto á hora indicada: os máis experimentados fronte ós fogóns.

Mentres tanto, os imprescindibles colaboradores, este ano tocoulle ao alumnado de 3ºC, facían cucuruchos (bueno, algúns o intentaban).

O pinche vixiaba para que a pitanza non se queimara.

E as castañas, pouco a pouco, máis douradas (algunhas un pouco carbonizadas)

Unha vez asadas, o equipo de cociña encheu os cucuruchos...

que non tardaron en desaparecer engullidos polos rapaces cansados de xogar.

Grazas a todos/as pola vosa colaboración e bo día que pasamos!

FACENDO FÍSICA DE PARTÍCULAS

O pasado martes 6 de novembro o alumnado de Física e Química de 4º da ESO do noso colexio asistiu á videoconferencia Facendo Física de Partículas polo mundo que organizou a Coordinadora Galega de ENDL para festexar o III Día da Ciencia e a Tecnoloxía en Galego que convocan os colectivos de docentes de Matemáticas, Ciencias e Tecnoloxía co fin de reinvindicar que a ciencia e a tecnoloxía se poden expresar, e ensinar, tamén en galego.

Na charla participaron cinco investigadores galegos que traballan en proxectos punteiros que se desenvolven no CERN, The European Organization for Nuclear Research (orixinalmente: Conseil Européen pour la Recherche Nucléaire), o máis grande laboratorio de Física de Partículas do mundo que está situado en Xenebra na fronteira entre Francia e Suiza. E falaron dende Santiago de Compostela, Xenebra, Londres e Lisboa para máis de 6.000 estudantes de máis de 90 centros de Secundaria e Bacharelato de todo o país. Iso si, tomando como punto de partida o noso colexio, pois foi dende Soutomaior dende onde se presentou a videoconferencia para toda Galiza.

Patricia Conde, Olalla Castro, Abraham Gallas, Carlos Salgado e Cibrán Santamarina contaron a súa experiencia científica e responderon algunhas das centos de preguntas coas que os rapaces e rapazas os bombardearon durante boa parte da charla: que supón o descubrimento do Bosón de Higgs?, que é a antimateria?, que son os quarks e os gluóns?, etc., pero tamén preguntas máis persoais sobre a carreira investigadora, a dedicación ao seu campo de investigación ou os pasos que deberon seguir para chegar onde hoxe están.

O que nos quedou claro é que, como eles mesmos recalcaron, dende colexios e institutos coma os nosos, con profesores e profesoras coma os nosos, e con forza de vontade, moita ilusión e ganas de aprender a esgalla podemos chegar ben lonxe. Tamén animaron ás rapazas a estudar carreiras de ciencias, que parece que non é moi habitual, cando menos en Física, e tamén a facer ciencia e tecnoloxía en galego, que nunca foi obstáculo nun contexto multilingüe como o que se moven para desenvolver o seu traballo. É máis, afirmaron que tanto no contexto informal como no académico o galego comparte espazo en diálogo e en pé de igualdade con outras ducias de idiomas no maior proxecto europeo de investigación.
(Organizado polo Departamento de Física e Química e ENDL para o alumnado de 4º ESO que cursa Física e Química).

A MENTE COMO CENTRO DE CONTROL

O mércores 17 de outubro o alumnado de 4º ESO asistiu en Vigo a unha conferencia sobre a relación entre a mente e as novas tecnoloxías. “Comprobamos cómo os impulsos neuronais son suficientes para conducir unha bola entre distintos obstáculos”, Germán Vidal.

“Ademais, a través dun aparello colocado na cabeza dunha persoa, pódesen realizar movementos externos ao corpo humano, como levantar unha pelota e mantela en movemento”, comentounos Andrea Rodríguez.

(Organizado polo Departamento de Tecnoloxía para o alumnado de 4º ESO).

TORNEO DE XADREZ

Este curso, dende a Biblioteca, volvemos a organizar o Torneo de Xadrez para o alumnado de Secundaria. Imos pola 3ª edición e sempre tivo moito éxito.

Inscribíronse 24 participantes: 22 alumnos+2 alumnas. Están representados tódolos niveis da ESO, dende 1º ata 4º.

O día 23 de outubro comeza a 1ª ronda. Cada xogador/a enfrontarase en 2 partidas a un contrincante elixido, por sorteo, ó azar.

Que teñades moita sorte!

Que gañe o mellor!

(Alumnado participante: aberto a toda secundaria. Organizado polo equipo encargado da Biblioteca).

BENVIDA

Este quere ser un lugar de encontro entre toda a comunidade educativa do CPI Manuel Padín Truiteiro. Aquí publicaremos regularmente as actividades e saídas didácticas nas que participe o alumnado de secundaria. Os profesores/as responsables ou ben os propios estudantes, escribirán as súas impresións sobre a actividade proposta e mostrarán algunhas das fotos de recordo que sacaron. Sentídevos libres de opinar ou comentar sobre o que se vai organizando desde o centro educativo. Benvidos a todos/as!